Xəbər verdiyimiz kimi, tarixçi Bəxtiyar Çələbi Gəncə şəhərində yerləşən tarixi binanın sökülməsinə görə sərt reaksiya göstərib.
Gencexeber.az-ın əldə etdiyi məlumata əsasən, Atatürk prospekti, 279 ünvanında yerləşən yaşayış evi abidə kimi dövlət qeydiyyatında olmayıb. Tikili xüsusi mülkiyyətdədir.
Ayrıca çay daşları ilə onillər bundan öncə inşa edilən binanın heç bir tarixi əhəmiyyəti də yoxdur. Gəncə Şəhər İcra Hakimiyyətinin sabiq başçısı Elmar Vəliyevin tapşırığı əsasında, sadəcə Gəncədə aparılan tikinti-quruculuq işləri zamanı şəhərin tarixi simasının qorunması məqsədi ilə fasadı qırmızı kərpiclə üzlənib.
Hətta bir müddət əvvəl həmin mülkə yiyələnmək istəyən şəxs, alqı-satqı prosesindən öncə tikilinin tarixi əhəmiyyətli bina olmasına dair şübhələrini aradan qaldırılmaq məqsədilə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinə də müraciət edib.
Qurumdan binanın heç bir tarixi dəyərinin olmadığı, eləcə də dövlət qeydiyyatına alınmadığı rəsmi cavabla təsdiqlənib.
