Gəncədə bir neçə il əvvəl qazılan xəndək ciddi problemlərə yol açıb.
Gencexeber.az-a bu barədə şikayət daxil olub.
Şikayətçi bildirir ki, şəhərin Nizami prospektində illər öncə qazılan dərin xəndək əsl problemə çevrilib:
“Bir neçə il əvvəl bina tikintisi üçün nəzərdə tutulan ərazidə xəndək qazılıb, sonra isə işlər yarımçıq saxlanılıb. Bu haldan da zərər çəkən sakinlərdir. Axşam saatlarında həmin yerdə hərəkət çox təhlükəlidir. Bir neçə dəfə azyaşlılar və xanımlar bu xəndəyə düşüblər, xəsarət alıblar.
Bundan əlavə, xəndəyə məişət tullantıları atılır və yandırılır.
Sakinlər dəfələrlə aidiyyəti qurumlara müraciət etsələr də, problem həllini tapmır. Qurumların məsələni həll etmək üçün nəyi gözlədikləri maraqlıdır”.
