Gencexeber.az-ın bugünkü müsahibi çini qablar üzərində miniatür təsvirlər yaradan rəssam Rasim Hüseynovdur.
Müsahibəni təqdim edirik:
- Öncə özünüz haqqında məlumat verməyinizi istərdim. Çini qablarla məşğul olmağa necə başladınız?
- 1948-ci ildə Gəncə şəhərində anadan olmuşam. Uşaqlıqdan rəssamlığa həvəsim var idi. Ordu sıralarından qayıtdıqdan sonra Çini Qablar zavoduna naxışçı rəssam kimi qəbul olmuşam.
- Çini qabların hazırlanmasında hansı texnikalardan istifadə edirsiniz və özünəməxsus çətinlikləri varmı?
- Çox çətin sənət növünə aiddir. Çünki bir qədər boya qalın vurulanda qaynayır, nazik vurulanda isə sobada yanıb, yox olur.
- Bu sənəti seçməyinizin arxasında hansı motivlər dayanır?
- Sırf həvəsim olduğu üçün bu sənəti seçdim.
- Çini qabların hazırlanmasında ən çox hansı materiallardan istifadə edirsiniz?
- Şirəüstü boyalardan daha çox istifadə edirəm. Bu boyalar 800 dərəcə temperaturda sobada bişir, şirəaltı boyalar isə 1350 dərəcədə bişir.
- Bu sənətin əsas fərqləndirici xüsusiyyətləri nədir?
- Çininin başqa rəssamlıq növündən fərqi ondadır ki, min illərdə torpağın altında qalsa belə, boya öz keyfiyyətini saxlaya bilir.
- İlham aldığınız sənətkarlar və ya dövrlər varmı?
- 1981 ildə miniatür sənəti ilə tanış oldum. Bu sənət növü Şərq poeziyasının əsasında yaranan sənətdir O vaxtdan bu günə qədər miniatür sənətini çini qabların üzərində işləyirəm. Əsasən Nizami Gəncəvinin əsərlərinə müraciət edirəm.
Orta əsrlərin görkəmli miniatür ustası Soltan Məhəmməd Mirağa Əli və başqa sənətkarın əl işlərindən ilham alıb, yaradıcılıq fəaliyyətimi davam etdirirəm.
- Çini qabın hazırlanma müddəti nə qədərdir və hansı mərhələlərdən keçir?
- Mənim sobam ancaq şirəüstü boyalar üçün nəzərdə tutulub. Eskiz hazır olduqdan sonra 5, 10, 15 gün çəkir. Sonra sobaya qoyulur. Elə olur ki, bir işim sobaya 2 dəfə girir Çünki boyaların bişmə temperaturu müxtəlif olur.
- İşlərinizdə ən çox hansı motivlər və naxışlar istifadə olunur?
- Milli naxışlardan çox istifadə edirəm.
- Bu sənəti gələcək nəsillərə necə çatdırmaq istəyirsiniz? Çini sənətinə yeni başlayanlara nə məsləhət verirsiniz?
- Gələcək nəslə çatdırmaq mənim yaralı yerimdir. Çünki Gəncədə heç bir rəssamın emalatxanası yoxdur. Yeni başlayanlara tövsiyəm odur ki, çox səbirli olsunlar.
- Ailədə sizdən başqa bu sənətlə məşğul olan varmı?
- Ailəmdə uşaqlarım öyrənib, ancaq işləmirlər.
- Gəlir nə qədər əldə edirsiniz?
- O qədər də yüksək gəlir əldə edə bilmirəm.
- Sərginiz keçirilibmi?
- 2015-ci ildə Fransada Heydər Əliyev Fondunun dəstəyi ilə Mədəniyyət günlərində əl işlərimlə iştirak etmişəm. “Formula 1”də də əsərlərim nümayiş olunub. Bakıda keçirilən Novruz bayramı şənliklərində və turizm sərgilərində, 2023-cü ildə Laçında Laçın günlərində iştirak etmişəm.
- Şagirdiniz varmı?
- Əgər emalatxana olsa, şagird hazırlamağı özümə şərəf sayardım. Miniatür sənətini inkişaf etdirməyi nəzərdə tuturam. Bu sənət Azərbaycana aid bir sənət növüdür.
Nəzrin Vahid
