Gəncədə müğənni Səbinə Abbasovanın ölümü ilə bağlı aparılan cinayət üzrə məhkəmə prosesinin təfərrüatları məlum olub.
Gencexeber.az-ın əldə etdiyi məlumata görə, məhkəmənin istintaqı Gəncə Ağır Cinayətlər Məhkəməsində aparılıb.
Müğənni Səbinə Abbasovanın ölüm xəbəri 2023-cü ilin noyabrın 2-də yayılıb. Onun ölümündə ögey qardaşı Hüseyn Abbasov təqsirli bilinərək saxlanılıb.
Hüseyn Abbasov Cinayət Məcəlləsinin 120.2.2 və 120.2.4-cü maddələri ilə ittiham olunub.
Cinayətin məhkəmə istintaqında təqsirləndirilən ögey qardaş Hüseyn Abbasov ifadə verib. Onun sözlərinə görə, Səbinə Abbasova onun ata bir bacısıdır:
“Səbinə ilə görüşüb, danışırdım. Ona dəfələrlə deyirdim ki, müğənnilikdən əl çəksin. Çünki müğənnilik edən qadının abır-həyası olmaz. Deyirdim ki, hər bir ehtiyacını ödəyirəm, müğənnilik fəaliyyətindən əl çək. Mənə borcunun olmasını bəhanə gətirdi. Ödəyəcəyimi dedim, razılaşmadı. Bundan sonra dəfələrlə gəlib danışmaq istəyəndə Səbinə dava salıb, səs-küy yaradırdı. Buna görə daha görüşmədim.
Axırıncı dəfə noyabrın 2-si Sumqayıtdan Gəncə şəhərinə gəldim. Uşağın məktəbə getməsini gözlədim. Məktəbə getdikdən sonra fikrim evə qalxıb, söhbət etmək idi. Orada olduğumdan bacım xəbər tutub, yanıma gəlib nə üçün gəldiyimi soruşdu. Söhbət etmək istədiyimi deyəndə yenə səs-küy salmağa başladı. Dedim ki, camaat baxır, burda danışmayaq. Başladı söyüş və təhqirlər etməyə, mən də əsəbiləşib üzərimdə olan bıçaqla onu öldürdüm. Səbinə polisə şikayətə gedən zaman arxasından tutub 17 dəfə bıçaqladım. Yanımızda onun balaca qızı var idi. Səbinənin ölümünə səbəb onun qohumları oldu. Mən sadəcə vasitəçi idim”.
Daha sonra məhkəmədə şahid qismində Səbinə Abbasovanın qızı ifadə verib:
“Hüseyn mənim dayımdır. Hadisə gözümün qabağında baş verdi. Anam səhər toya gedəcəkdi, onun əynini sahmana salmaq üçün oyandım. Yuxudan duranda anamın telefonla danışığını gördüm. Bir yerdə həyətə düşdük. Anam polisə qaçan zaman hadisə baş verdi. Hüseyn amansızca dəfələrlə bıçaqladı. Qorxu və həyəcan içində onlara tərəf qaçaraq ona “anamı vurma, burax anamı” deyə yalvarsam da, o, kürəyindən bıçaqla zərbələr vurmağa davam etdi”.
Şahidlərin dediyinə görə, Hüseyn Abbasov ögey bacısı Səbinə Abbasovadan pul və onu evləndirməsini istəyib. Bunu yerinə yetirmədiyi üçün ögey bacısını öldürüb.
Hüseyn Abbasov bundan qabaq da ölüm hadisəsi ilə bağlı məhkumluq həyatı yaşayıb. Belə ki, o, öz doğma anasını öldürüb. Öldürmə səbəbi isə oxşar hallar olub. Bu cinayət səbəbindən 15 il cəza alıb, hadisədən 6 ay əvvəl həbsdən azad edilib.
Məhkəmənin yekun qərarı ilə Hüseyn Abbasov 19 il müddətində azadlıqdan məhrum edilib. Qərara əsasən, o, cəzasının ilk 5 ilini həbsxanada, qalan hissəsini isə xüsusi rejimli cəzaçəkmə müəssisəsində çəkəcək.
Fidan İlqar
