Gəncədə uşağın ayağı avtobusun döşəməsində olan dəliyə düşüb.
Gencexeber.az-a daxil olan şikayətdə bildirilib ki, hadisə Gəncə şəhəri ərazisində fəaliyyət göstərən 1 saylı marşrut avtobusunda baş verib: “Aylardır bu nəqliyyat vasitəsinin döşəməsində dəlik əmələ gəlib. Deşikdən asfalt, habelə kardan mili də görünür”.
Şikayətçinin sözlərinə görə, təhlükəsiz hərəkətin təmin edilmədiyi bu marşrut xəttində dünən xoşagəlməz hal baş verib.
Belə ki, avtobus hərəkətdə olan zaman sözügedən dəliyə məktəblinin ayağı düşüb. Xoşbəxtlikdən uşaq xəsarət almayıb. Digər sərnişinlər ona yardım edərək ayağını deşikdən çıxarıblar.
“Avtobusun döşəməsindəki dəliyə ilk öncə mənim ayağım düşdü. Bir müddət sonra avtobusa minən uşağın da ayağı ora tuş gəldi. Avtobus sürücüsü isə ona bildirilən irada cavabında “Mən nə edim, sərnişinlər qırıb” deyib” - şikayətçi əlavə edib.
Xatırladaq ki, Gəncədə 1 saylı marşrut üzrə hərəkət edən digər avtobusda da eyni problemin olması ilə bağlı xəbər vermişdik.
