Gəncədə 24 yaşlı gənc dünyasını dəyişib.
Gencexeber.az-ın əldə etdiyi məlumatına əsasən, Gəncə Beynəlxalq Xəstəxanasında 2001-ci il təvəllüdlü Türkan Balakişizadə həyatını itirib.
Mərhum iki həftə öncə əlindəki ziyili götürmək üçün tibb ocağına müraciət edib. Xanım ona tətbiq ediləcək yerli keyitmədən imtina edərək ümumi narkozun verilməsini tələb edib.
Əməliyyat vaxtı T.Balakişizadənin bədəni ümumi narkoza allergik reaksiya verib və xəstə anafilaktik şok keçirib. Həkimlərin bir neçə saat boyunca müdaxiləsi nəticə verməyib.
Bir müddət sonra beyin ölümü keçirən gəncin vəziyyətində on gündən çox müddət ərzində heç bir müsbətə doğru irəliləyiş baş verməyib. Bazar günü, yəni fevralın 23-ü isə o, dünyasını dəyişib.
Nişanlı olan T.Balakişizadə Gəncə regional “ASAN xidmət” mərkəzində yerləşən Azərbaycan Beynəlxalq Bankının əməkdaşı olub.
