Gəncə Dövlət Dram Teatrı qastrol səfərinə hazırlaşır. Bu haqda 4 oktyabr tarixində Kəpəz TV-yə istinadən xəbər veririk.
Gəncə Dövlət Dram Teatrının yaradıcı heyəti oktyabrın 18-dən 15 gün ərzində Avrasiya Teatrlar Birliyi tərəfindən İstanbul şəhərində keçirilən V Maltəpə və Ankarada keçirilən XV Etos Beynəlxalq teatr festivallarında iştirak edəcək. Mədəniyyət ocağı Türkiyədə keçiriləcək səfərlərdə yazıçı Ejon İoneskonun “Kral ölür” tamaşasını nümayiş etdirəcək.
Bundan başqa, təmsilçilərimiz Giresun və Gürcüstanın Uzergetik şəhərində də çıxış edəcəklər.
Avrasiya Teatrlar Birliyinin Azərbaycan təmsilçisi Yusif Cəfərov bildirib ki, kollektiv, həmçinin yeni bir tamaşa üzərində işləyir. Əsər komediya janrındadır. Tamaşa Sabit Rəhmanın “Yalan” əsəri əsasında hazırlanıb. Premyerası isə oktyabrın 7-də baş tutacaq.
