Gəncəli idmançılar yarışda uğur qazanıblar. Bu haqda 1 iyun tarixində Kəpəz televiziyasına istinadən xəbər veririk.
Bakıda Qazaxıstan yığmasının da iştirak etdiyi cüdo turnirində idmançılarımız yüksək nəticə əldə ediblər. Azyaşlıların yarışında Əməkdar məşqçi Xanəhməd Rzazadənin 3 yetirməsi qüvvəsini sınayıb. Onlardan biri fəxri kürsüdə yer ala bilməyib. Digərləri doğma şəhərə medalla dönüblər. 2014-cü il təvəllüdlü oğlanlar arasında 30 kiloqram çəki dərəcəsində Mehrac Nəsirzadə turniri bürünc medalla tamamlayıb. Ən yaxşı nəticəni isə 27 kiloqram çəki dərəcəsində Vidadi Babazadə əldə edib. 9 yaşlı cüdoçu bütün rəqiblərini qabaqlayaraq, yarışda birinci olub.
Yetirmələrinin çıxışını dəyərləndirən Əməkdar məşqçi Xanəhməd Rzazadə nəticənin onu qane etdiyini deyib. Çalışdırıcı cüdoçuları gələcəkdə müvafiq yaş qrupu üzrə milliyə qazandırmaq arzusundadır. Azyaşlı cüdoçular üçün bu, mövsümün sonuncu yarışı olub. Payızda başlayacaq növbəti mövsümdə isə tatami ustaları zona və Azərbaycan birinciliyində iştirak edəcəklər.
