Gəncənin “Kəpəz” futbol klubu yeni idmançı ilə anlaşıb.
Gencexeber.az Bizim.media-ya istinadən xəbər verir ki, “Kəpəz” növbəti turun “Səbail”ə qarşı oyununa yeni legionerlə çıxacaq.
Söhbət Keverton Resende Markolinodan gedir. 23 yaşlı yarımmüdafiəçi bir müddətdir komandanın düşərgəsinə gəlib. Onun transfer sənədlərinin rəsmiləşdirilməsi bu həftə yekunlaşacaq və braziliyalı futbolçu ilə 1 illik müqavilə bağlanacaq.
Qeyd edək ki, Keverton Braziliyanın D seriyasında çıxış edən “Hersilio Luz”un şərəfini qoruyub. Ötən mövsüm 13 matçda şans qazanan oyunçu 1 məhsuldar ötürməylə yadda qalıb. Yarımmüdafiəçi karyerası ərzində “Audaks” və “Ponte Preta” kimi komandalarda çıxış edib.
