Xəbər verdiyimiz kimi, noyabrın 21-də Bakıda "Lake Hotel" restoranının yaxınlığında baş verən bədbəxt hadisə zamanı həlak olan dörd nəfərdən biri Gəncə Dövlət Universitetinin tələbəsi 19 yaşlı Eltac Əliyev olub.
Gencexeber.az məlumat verir ki, Eltac Əliyevin pulu ilə yaşadığı küçəyə asfalt salınıb. Bununla bağlı mərhumun yaxınları sosial şəbəkədə paylaşım edib.
Bildirilib ki, Eltacı sevənlər həmin küçəni "Eltac yolu" adlandırırlar: "Eltac pul yığmışdı, özünə qismət olmadı. Onun pulu ilə küçəyə asfalt salındı. Eltacın səsi təkcə xatirələrdə deyil, indi addım atdığımız bu yolda yaşayır. Bəziləri sözlərlə xatırlanar, bəziləri əməlləri ilə... Eltac küçəyə yalnız asfalt yox, böyük iz qoydu. İndi bu yola hər kəs "Eltac yolu" deyir, illərlə belə deyiləcək. Səninlə hər zaman qürur duymuşuq, Eltacım".
Qeyd edək ki, iş başında olarkən Eltac Əliyev və daha üç əməkdaş — 27 yaşlı Cavidan Muradlı, 20 yaşlı Emil Quliyev və 18 yaşlı Əkbər Zeynalov hotelin həyətinə dəmir konstruksiyalı pilləkəni apararkən bədbəxt hadisə baş verib.
Uzun pilləkən yüksək gərginlikli elektrik xəttinə toxunub. Nəticədə elektrik cərəyanı dörd əməkdaşı vuraraq öldürüb.
