Gəncədə imtahan prosesi haqda yayılan səs yazısına rəsmi cavab verilib. Bu haqda 15 iyul tarixində Oxu.az-a istinadən məlumat veririk.
Ötən gün 12 nömrəli tam orta məktəbdə Azərbaycan dili və ədəbiyyatı fənni üzrə test imtahanları keçirilib. Daha sonra bununla bağlı sosial şəbəkələrdə səs yazısı yayılıb.
Məsələ ilə əlaqədar Elm və Təhsil Nazirliyinin İnsan Resursları Mərkəzi məlumat yayıb. Qeyd olunub ki, səs yazısı həqiqəti əks etdirmir. İmtahan prosesində ləngimə və namizədlərin əlavə stres yaşamaması üçün imtahana dəvət olunan, lakin iştirak etməyən şəxslərin dəqiqləşdirilməsi məqsədilə adları oxunub:
“Diqqətinizə çatdırırıq ki, səs yazısında adıçəkilən şəxslər də müəllimlərin işə qəbulu üzrə müsabiqənin test imtahanlarında iştirak etməyiblər. Ölkənin 13 müxtəlif şəhər və rayonu üzrə ümumilikdə 29 imtahan mərkəzini əhatə edən müəllimlərin işə qəbulu üzrə müsabiqənin test imtahanları artıq dörd gündür davam edir. Cari tarixə qədər test imtahanlarında 42 515 namizəd iştirak edib. Müəllimlərin işə qəbulu üzrə müsabiqə yeni və peşəkar kadrların cəlb edilməsi məqsədi daşıyır. Vətəndaşları əsassız məlumatlar yaymaqdan çəkinməyə və cəmiyyətdə çaşqınlıq yaratmamağa çağırırıq. Bu tipli paylaşımların müəllifləri oxucu auditoriyasına hörmətlə yanaşmalı və insanların vaxtını əsassız məlumatlarla almamalıdırlar”, - deyə nazirlikdən bildirilib.
