Göygöl rayon Mərkəzi Xəstəxanasında doğuş zamanı vəfat edən 35 yaşlı Nuranə Cəbrayılovanın həyat yoldaşı Fizuli Cəbrayılov yoldaşının həkim səhlənkarlığından öldüyünü iddia edir.
Gencexeber.az-a açıqlamasında F. Cəbrayılov bildirib ki, həyat yoldaşını xəstəxanaya sağlam şəkildə aparılıb.
"Hamiləlik dövründə mütəmadi həkim yoxlanışından keçib. Heç bir problem aşkar olunmayıb. Vaxtı tamam olanda xəstəxanaya aparılanda da ultrasəs müayinəsi edilib.
Uşaq 3 kiloqramdan artıq olub. Həkim bizə ana və uşağın sağlam olduğunu, heç bir problemi olmadığını dedi. Doğuş şöbəsində Afət adlı həkim də hər şeyin normal getdiyini söylədi. Yoldaşım hətta məndən yemək almamı istədi.
Mən yemək alıb qayıdanda Afət həkim yenidən mənim qabağıma çıxıb dedi ki, yoldaşının özündən getməsi varmı? Mən də dedim, xeyr. Həkimlər mənə öldüyünü demədilər. Mən özüm məcbur qapını açdım və gördüm ki, yoldaşımın ağzında süni nəfəs aparatı var və o, artıq dünyasını dəyişib. Ancaq həkimlər yenə də boynuna almadı. Məni bayıra çıxardılar. Bir müddət sonra gördüm ki, həkim də yoxa çıxıb".
Məlumat üçün bildirək ki, bu, N.Cəbrayılovanın sonuncu övladını dünyaya gətirdikdən 14 ildən sonra sayca 4-cü hamiləliyi olub. Qadının 3 oğul övladı var.
