Gəncədə bir qrup şəxs polis tərəfindən saxlanılıb. Bu haqda 16 yanvar tarixində Kəpəz televiziyasına istinadən xəbər veririk.
Baş Polis İdarəsinin 1-ci Polis Şöbəsinə şəhər sakini Fərhad Əliyevin qanunsuz olaraq odlu silah saxlaması və gəzdirməsi barədə əməliyyat məlumatı daxil olub. Qurumun əməkdaşları şübhəli şəxsi saxlayıblar. Onun üzərinə baxış keçirilən zaman 1 ədəd “Makarov” markalı tapança, 7 ədəd həmin tapançaya aid patron aşkar edilərək götürülüb.
Bundan başqa, polis əməkdaşları tərəfindən şəhər ərazisində narkotiklərin qanunsuz dövriyyəsinə qarşı aparılan mübarizə çərçivəsində bir neçə nəfər saxlanılıb. Həmin vətəndaşların üzərində, avtomobillərində, yaşadıqları evlərdə və digər yerlərdə axtarış aparılan zaman müxtəlif çeşidli narkotik vasitələr, güclü təsiredici gücə malik narkotik maddələr aşkar edilərək götürülüb.
Saxlanılanlardan Fəxrəddin Əliyevin yaşadığı evdən 2 kiloqram, Elmir Yolçuyevin kirayə yaşadığı mənzildən isə 4 kiloqrama yaxın qurudulmuş marixuana aşkar edilərək götürülüb. Hər bir faktla bağlı Gəncə Şəhər Baş Polis İdarəsində cinayət işi başlanılıb.
Dövlət Yol Polisi Şöbəsinin əməkdaşları isə şəhər ərazisində hərəkətdə olan “Hyundai” markalı avtomobilin sürücüsünü yol hərəkəti qaydalarını pozduğu üçün saxlayıblar. Həmin nəqliyyat vasitəsini idarə edən Adil Aslanovun narkotik vasitə qəbul etməsinə dair şübhələr olduğu üçün o, tibbi müayinədən keçirilib. Nəticələrə əsasən, sürücünün narkotik vasitədən istifadə etdiyi məlum olub. O, məhkəmənin qərarı ilə 25 sutka müddətinə inzibati qaydada həbs edilib.
