Nazirliklərdən biri bayram günlərində iş rejimini açıqlayıb. Bu haqda Gencexeber.az-a 19 mart tarixində DİN-dən məlumat daxil olub.
Daxili İşlər Nazirliyindən verilən məlumata əsasən, Novruz bayramında Gəncə Şəhər Baş Polis İdarəsinin əməkdaşları gücləndirilmiş iş rejimində çalışacaqlar. Məqsəd həmin günlərdə ictimai asayişin, qanunçuluğun və hüquq qaydasının qorunmasıdır.
Kütləvi tədbirlərin, bayram şənliklərinin təşkil olunduğu, insanların sıx toplaşdığı yerlərdə polis naryadlarının sayı artırılacaq. Şəhər ərazisində, həmçinin avtomobil yollarında ictimai qaydanın, hərəkətin təhlükəsizliyinin təmin edilməsi məqsədi ilə qüvvə və imkanlar səfərbər ediləcək. Həmin günlərdə həyat təminatlı mühüm əhəmiyyətli obyektlərin mühafizəsi də nəzarətdə saxlanılacaq.
Nazirlik vətəndaşlardan bayram günlərində ictimai qaydalara riayət etmələrini, sürücülərin yol hərəkəti qaydalarını pozmamağını və digər hərəkət iştirakçılarının həyatlarına biganə yanaşmamalarını xahiş edir. Həmçinin şəhər sakinlərinə qarşılaşdıqları hüquq pozuntuları ilə bağlı “102” Xidməti Zəng Mərkəzi və ya ərazi üzrə polis orqanlarına müraciət etmələri tövsiyə olunur.
