Gəncə Dövlət Universitetinin tələbəsi nailiyyətləri ilə fərqlənməyi bacarıb.
Gencexeber.az-ın əldə etdiyi məlumata əsasən, “Azərbaycan Tələbələri” təhsil səhifəsi tərəfindən keçirilən müsabiqənin ilkin nəticələri elan olunub. Fəaliyyəti dövründə əldə edilən uğurlu nəticələrinə görə “İlin Tələbələri” layihəsində Nuranə Qədimova ilin tələbəsi adına layiq görülüb.
Tələbə təqaüdünə layiq görülən xanım imtahanlardan uğurla keçərək ortalama balını 94-ə çatdırmağa nail olub.
Qeyd edək ki, Nuranə Natiq qızı Qədimova 22 oktyabr 2002-ci ildə Gəncə şəhərində dünyaya gəlib. O, 2020-ci ildə şəhər Ə.Cavad adına 2 nömrəli tam orta məktəbi yüksək nəticələrlə bitirib.
Məktəb illərində müxtəlif fənn və bilik yarışlarında fəal iştirak edib, uğurlar qazanıb. 2021–2023-cü illərdə Gəncə Dövlət Universitetinin nəzdində fəaliyyət göstərən Regional Kollecdə təhsil alıb. 2023-cü ildə Gəncə Dövlət Universitetinin İqtisadiyyat və idarəetmə fakültəsinin Mühasibat uçotu ixtisasına qəbul olunub və hazırda həmin ixtisas üzrə II kurs tələbəsidir.
Təhsilini uğurla davam etdirən Nuranə Qədimova gələcəkdə mühasibatlıq sahəsində bilik və bacarıqlarını daha da inkişaf etdirməyi, ixtisasına uyğun olaraq peşəkar fəaliyyət göstərməyi hədəfləyir.
Xatırladaq ki, daha öncə Kimya və Biologiya üzrə Ləman Rüstəmli ilin tələbəsi adına layiq görülüb.
