Gəncədə dünyaya gəlib boya-başa çatan Əli Talıbov yüz minlərlə sosial şəbəkə istifadəçisinin diqqətini çəkməyi bacarıb.
Gencexeber.az məlumat verir ki, 25 yaşlı gənc telefon, planşet və kompüter kimi köhnə elektron cihazlardan qızıl çıxarma prosesini sosial şəbəkə hesabında paylaşır. Onun qiymətli metalları necə əldə etdiyini nümayiş etdirdiyi videolar çox sayda baxış toplayıb.
Redaksiyamız sözügedən sənətlə məşğul olan Ə.Talıbovla əlaqə saxlayıb. O, bir neçə ildir ki, bu işi gördüyünü deyib. Onun sözlərinə görə, elektron platalarda yerləşən çiplərin üzərindəki kiçik qızıl hissəciklər müxtəlif cihazlarda mikrosxemlərin keçiriciliyini yaxşılaşdırmaq üçün istifadə olunur.
Əli iddia edir ki, 150-yə yaxın köhnə telefonu emal etməklə bir qram qızıl əldə oluna bilər.
“Mən bu işi internet vasitəsilə öyrəndim və o vaxtdan da bunu edirəm. Videolarım populyarlaşır və bu sənəti öyrənmək istəyənlər mənə yazır. Hətta başqa ölkələrdən iş təklifi də almışam” - Əli söyləyib.
Sənətkar bu qədər plataları haradan əldə edirsiniz sualına cavabında deyib ki, sözügedən cihazların təmiri ilə məşğul olan şəxslərdən, eləcə də istifadə edilmiş ehtiyyat hissələrinin satışı ilə məşğul olan yerlərdən tapır.
Sosial şəbəkələrdə uğur qazanmasına baxmayaraq, gənc etiraf edib ki, onun əsas işi aşpazlıqdır, qızıl çıxarma isə sadəcə hobbisi olaraq qalır.
