Gəncədə ağacların quruması halları artıb. Bu haqda 18 iyul tarixində AzTV-yə istinadən məlumat veririk.
Bir müddətdir sürən qeyri-sabit hava şəraiti və anomal istilər Nizami yurdunun yaşıllıq massivinə mənfi təsir göstərib. Monitorinqlər zamanı müəyyən olunub ki, şəhər ərazisində bu ilin 6 ayı ərzində ümumilikdə 220 ədəd müxtəlif növ irigövdəli ağacın quruması hallarına rast gəlinib.
Xanbağında bu bitkilərin qurumasının səbəbini tapmaq məqsədilə elmi araşdırmalar aparılıb. Elmi Tədqiqat Bitki Mühafizə İnstitutu və Aqrar Universitetin mütəxəssisləri ağaclardan nümunələr götürüblər. Müəyyən olunub ki, bitkilərin bir hissəsi öz biloloji inkişaf dövrünü başa vurduğu üçün quruyub. Lakin bəzi ağaclar var ki, suvarma sistemi düzgün təşkil olunmayıb, su qıtlığı və yaxud müxtəlif növ xəstəliklərin qurbanı olub.O cümlədən Gəncə-Bakı yolu ərazisində “Det-al Alüminium” MMC-nin qarşısındakı qurumuş ağaclarda kök xərçəngi aşkar edilib. Bu xəstəliklərin aradan qaldırılması və qurumuş bitkilərin yeniləri ilə əvəz olunması üçün Gəncə şəhər 10 saylı Regional Ekologiya və Təbii Sərvətlər İdarəsinə müraciət olunub.
Bundan sonra şəhərin müxtəlif ərazilərində həmin ağacların 60-70 ədədi Ekologiya İdarəsinin müvafiq ekspertiza rəyi əsasında kəsilərək götürülüb.
