Bu gün Azərbaycanın ilk təhsil nazirinin doğum günüdür. Bu haqda Gencexeber.az 5 iyul tarixində məlumat verir.
Nəsib bəy Yusif bəy oğlu Yusifbəyli 5 iyul 1881-ci ildə Gəncədə ziyalı ailəsində dünyaya gəlib. O, Gəncə klassik gimnaziyasını bitirdikdən sonra Novorossiysk Universitetinin hüquq fakültəsinə daxil olub.
O, burada milli azadlıq hərəkatına qoşulub, azərbaycanlı tələbələrin "Həmyerlilər" təşkilatının rəhbərlərindən birinə çevrilib. Bu səbəbdən çar hökuməti tərəfindən təqiblərə məruz qalıb və 1906-cı ildə Krımın Bağçasaray şəhərinə köcüb. Burada Nəsib bəy İsmayıl bəy Qaspıralının redaktoru olduğu “Tərcüman” qəzetində işləməyə başlayıb. 1908-ci ildə təqiblərdən yaxa qurtarmaq üçün İstanbula köcüb.
Bir il sonra Vətənə dönüb, Gəncə şəhər bələdiyyəsində çalışıb. 1911-ci ildə "Mədrəseyi-ruhaniyyə" məktəbində çalışıb, "Molla Nəsrəddin" jurnalına və qəzetlərə məqalələr göndərib, "Müsəlman xeyriyyə cəmiyyəti", "Müsəlmanların maariflənməsi cəmiyyəti", "Aktyorlar cəmiyyəti"inin fəaliyyətində yaxından iştirak edib. Bu zaman Məmməd Əmin Rəsulzadə ilə tanış olub və ictimai-siyasi fəaliyyətə başlayıb.
Mirzə Fətəli Axundovun anadan olmasının 100 illiyi münasibətilə Gəncədə Azərbaycan dilində ilk kitabxana təsis edib. O, qardaşı Həmid bəy Yusifbəyli, Ələkbər bəy Rəfibəyli, Ələsgər bəy Xasməmmədovla birlikdə "Qeyrət" təşkilatını yaradıb.
28 may 1918-ci ildə Azərbaycan Xalq Cümhuriyyəti qurulduqdan sonra Fətəli Xan Xoyskinin təşkil etdiyi birinci hökumət kabinəsində Yusifbəyli maliyyə və xalq maarifi naziri, ikinci və üçüncü hökumət kabinələrində isə xalq maarifı və dini etiqad naziri vəzifələrini tutub.
1920-ci ilin martına qədər baş nazir vəzifəsində çalışan Nəsib bəy Yusifbəyli Aprel çevrilişindən sonra Parlamentin axırıncı iclasından qayıdaraq ailəsi ilə son görüşündə: "Fələk məni çox yüksəltdi. Fəqət mən dünyanın ən bədbəxt insanıyam", - söyləyib. Həmin ilin 31 may tarixində Nəsib bəy Yusifbəyli ölkəni tərk edərkən qətlə yetirilib.
Məmməd Əmin Rəsulzadə 1929-cu ildə yazırdı: "Azərbaycan ideyasını siyasi bir tələb maddəsi şəklində formulə etmək şərəfi mərhum Nəsib bəyindir... Bu, Nəsib bəy ismini (adını) Azərbaycan tarixində ölməz və unudulmaz bir isim halına qoymaq üçün kafidir..."
[modula id="40181"]
