Bu gün, 26 mart tarixində 3 şəhidimizin mövlud günüdür.
İbrahimov Rövşən Duman Oğlu 1975-ci ildə dünyaya göz açıb. Orta təhsilini 37 nömrəli orta məktəbdə və texniki-peşə məktəbində alıb. Rövşən İbrahimov 1994-cü il yanvarın 3-də Gəncə şəhəri Nizami Rayon Hərbi Komissarlığı tərəfindən həqiqi hərbi xidmətə yollanıb. 1994-cü ilin fevral ayında topçu vəzifəsində xidmət edən Rövşən şəhid olub. Gəncə şəhər Şəhidlər xiyabanında dəfn olunub.
Rustəmov Vaqif Rüstəm oğlu 1954-cü ildə Gəncə şəhərində anadan olub. 13 saylı fəhlə gənclər məktəbini bitirərək Krasnoyarsk vilayətində həqiqi xidmətdə olmuşdur. Bir müddət Xabarovsk şəhərində Daxili İşlər İdarəsində və “Azərlift”in Gəncə şöbəsində elektro-mexanik vəzifəsində çalışıb. 1 saylı Gəncə özünümüdafiə batalyonunun yaranmasında iştirak edib. Çaykənd, Azad, Todan kəndlərinin düşməndən təmizlənməsində fəallıq göstərib. Vaqif Rüstəmov Çaykənd uğrunda gedən döyüşlərdə 1992-ci il yanvarın 16-sı şəhidlik zirvəsinə ucalıb.
Teymur Novruz oğlu İsmayılov 1970-ci ildə Gəncədə anadan olub. Ailənin tək övladı olan Teymur 27 saylı texniki-peşə məktəbini bitirib. Almaniyada həqiqi hərbi xidmətdən sonra Şüşə emalı zavodunda fəhlə işləyib. 1993-cü il iyulun 5-də könüllü olaraq cəbhəyə gedib. 1993-cü ildə Ağdamın Şelli kəndində döyüşlərdə şəhid olub. Məzarı Gəncənin Şəhidlər xiyabanındadır.
