Bu gün, 22 mart tarixində 3 şəhidimizin mövlud günüdür.
Həsənov Ceyhun Oruc oğlu 1969-cu ildə Gəncə şəhərində anadan olub. Əvvəlcə 22 №-li orta məktəbi, sonra, 1986-cı ildə 15 saylı texniki peşə məktəbini bitirib. Həm qaynaqçı, həm də sürücü peşəsinə yiyələnib. Bir müddət Dəmir-beton məmulatı zavodunda, sonra isə Abadlaşdırma trestində sürücü işləyib. 1987-1989-cu illərdə Amur vilayətində hərbi xidmətdə olub.
Ceyhun Həsənov 1993-cü ildə hərbi xidmətə çağırılıb, 709 saylı hərbi hissədə atıcı vəzifəsində xidmət edib. Tərtər-Ağdam döyüş bölgəsində fəallıq göstərib. Gülablı, Selli, Boyəhmədli kəndlərinin müdafiəsində iştirak edib.
O, 24 iyun 1993-cü ildə Boyəhmədli kəndində şəhid olub. Mərhumun doğma mənzilinə xatirə lövhəsi vurulub, 3 yerdə xatirə bulağı inşa edilib. Ölümündən sonra “İgidliyə görə” medalı ilə təltif olunub.
Abbasov Şəmil Kamil oğlu 1959-cu ildə Gəncə şəhərində anadan olub. 4 №-li internat məktəbinin 8-ci sinfinədək oxuyan Şəmil 1973-cü ildə 27 saylı texniki-peşə məktəbini bitirib. Gön-dəri məmulatının emalı ixtisasına yiyələnib. Bir müddət ayaqqabı tikiş sexində işləyib.
Şəmil Abbasov 1976-1978-ci illərdə Həştərxanda həqiqi hərbi xidmətdə olub. 1979-cu ildən Gəncə şəhəri 1 saylı ayaqqabı məmulatları sexində əmək fəaliyyətinə başlayıb. 1990-cı ildə ailə həyatı qurub.
1991-ci il dekabrın 19-da Nizami Rayon Hərbi Komissarlığı tərəfindən səfərbərliyə alınıb. 1-ci Gəncə taborunda atıcı idi. Göstərdiyi hərbi şücaətə görə dəfələrlə ruhlandırıcı mükafatlara layiq görülüb. 3 iyun 1992-ci ildə Ağdərə uğrunda gedən döyüşlərdə şəhid olub. Mərhumun Günay adlı yeganə övladı yadigar qalıb.
Əliyev Etibar Nuru oğlu 1968-ci ildə Gəncə şəhərində anadan olub. Texniki-peşə məktəbində oxuyaraq tikinti idarəsində də işləyib. Həqiqi hərbi xidmətini Vorkuta şəhərində keçirib. Qayıdanda bir müddət Alüminium zavodunda quraşdırıcı işləyib. 1992-ci ildə Kəpəz Rayon Hərbi Komissarlığı tərəfindən səfərbərliyə alınıb, 181 saylı hərbi hissədə xidmət edib.
Etibar Əliyevin əsas döyüş yolu Beyləqan istiqamətində olub. Sıravi atıcı idi. Əməliyyatların birində Etibar Əliyev sərrast atəşlə düşmən tankını sıradan çıxarıb. Onun bu şücaəti 181 saylı hərbi hissə komandiri tərəfindən Fəxri Fərman və qiymətli mükafatla qiymətləndirilib. 5 aprel 1994-cü ildə şəhidlik zirvəsinə ucalıb.
