Gəncədə apteklərin birində qayda pozuntusu aşkarlanıb. Bu haqda 28 mart tarixində AQTA-ya istinadən məlumat veririk.
Azərbaycan Respublikasının Qida Təhlükəsizliyi Agentliyinin (AQTA) əməkdaşları Atatürk prospekti, ev 237/7 ünvanında yerləşən “Şəfa-Farm” firmasına məxsus aptekdə planlı yoxlama keçiriblər. Nəticədə “SEL” MMC tərəfindən istehsal olunan “UM” və “Şəfa” əmtəə nişanlı bitki mənşəli çaytikanı yağının qablaşdırılmasında həqiqətə uyğun olmayan məlumatların göstərildiyi, məhsulun saxlanma müddətinin normativ sənəddə 12 ay göstərilməsinə baxmayaraq, etiket məlumatında 3 il qeyd olunduğu, eyni zamanda məhsulun istifadə təlimatları haqqında məlumatların qeyd olunduğu içlik vərəqələri ilə təmin edilmədiyi məlum olub.
Müayinələr üçün məhsullardan nümunələr götürülərək AQTA-nın laboratoriyasına təqdim edilib. Nəticədə satışı həyata keçirilən bitki mənşəli yağın çaytikanı deyil, günəbaxan yağı olması üzə çıxıb.
Sahibkar barəsində inzibati qaydada tədbir görülüb, adıçəkilən bitki məhsulunun satışının dayandırılması ilə bağlı qərar qəbul edilib, uyğunsuzluqların aradan qaldırılmasına dair icrası məcburi göstərişlər verilib.
[modula id="34892"]
