Şəmkirli yeniyetmə Rusiyada qətldə şübhəli bilinir.
Bununla bağlı Rusiya vətəndaşı Mariya Usoltseva sosial şəbəkə hesabında video paylaşıb.
O bildirib ki, bu ilin yanvarında Şəmkirin Zəyəm qəsəbəsində atası Arif Nəbiyevi öldürməkdə şübhəli bilinən 15 yaşlı D.N. daha sonra Rusiyaya gəlib. Mariya Usoltsevanın iddiasına görə, həmin yeniyetmə burada onun oğlunu, keçmiş sinif yoldaşı Aleksandr Usoltsеvi bıçaqlayaraq qətlə yetirib.
Qadının əsas narazılığı Rusiyanın qəyyumluq orqanları və miqrasiya xidməti ilə bağlıdır. Onun fikrincə, müvafiq qurumlar bu barədə mütləq şəkildə məlumatlı olmalı idi.
Həlak olan Aleksandr Usoltsеvin valideynləri şübhəlinin "Telegram" hesabına daxil olaraq, iyun ayının sonundan sonra aparılan yazışmalarını da araşdırıblar. Mariya Usoltseva mesencerdə həmin yeniyetmənin skulşutinq (məktəblərdə kütləvi qətllər) mövzusuna istinad edən nikdən istifadə etdiyini bildirib.
Qeyd edək ki, 15 yaşlı oğlanın Şəmkirdəki cinayətdən sonra 23 yaşlı qardaşı ilə birgə Gəncə-istanbul-Moskva reysi ilə ölkədən qaçdıqları bildirilib. 1970-ci il təvəllüdlü Arif Nəbiyevin qardaşı Elbrus Nəbiyev iddia edib ki, cinayəti mərhumun övladları birgə törədib. Hadisədən sonra onlar atalarının meyitini su kanalına atıblar. Meyit bir neçə gün sonra tapılıb.
28 avqust tarixində isə Rusiyanın Xantı-Mansiysk şəhərində polislər tərk edilmiş bir tikilidə 15 yaşlı Aleksandr Usoltsеvin üzərində bıçaq yaraları olan cəsədini aşkar ediblər. Qətl hadisəsindən sonra D.N. barəsində həbs qətimkan tədbiri seçilib.
Mənbə: qafqazinfo.аz
