Azərbaycan Texnologiya Universiteti tələbələri üçün ödənişsiz ingilis dili təlimlərinə start verilir.
Gencexeber.az-a ATU-dan verilən məlumata görə, tələbələrin xarici dil bacarıqlarının inkişaf etdirilməsi məqsədilə təşkil olunan təlimlər yalnız 1-ci və 3-cü kurs tələbələri üçün nəzərdə tutulub. Bildirilib ki, 2-ci və 4-cü kurs tələbələri üçün I semestr üzrə təlimlər artıq başa çatıb.
Təlimlərə 15 aprel tarixində başlanılacaq və 15 mayadək davam edəcək.
Təlim qrafikinə əsasən, müəllim Səbinə Bağırova tərəfindən keçiriləcək dərslər həftənin 2-ci və 4-cü günləri, saat 13:30-dan 14:30-dək təşkil olunacaq.
Digər qrup üzrə dərsləri isə Leyla Kərimova aparacaq. Onun təlimləri həftənin 1-ci və 4-cü günləri, saat 13:30-dan 14:30-dək keçiriləcək.
Qeyd olunub ki, təlimləri uğurla başa vuran tələbələr sertifikatla təltif ediləcəklər.
