Azərbaycan Texnologiya Universiteti (ATU), Azərbaycan Basketbol Federasiyası (ABF) və Gəncə-Daşkəsən Regional Gənclər və İdman İdarəsinin birgə təşkilatçılığı ilə Ümummilli Lider Heydər Əliyevin anadan olmasının 103 illiyinə həsr olunmuş region ali təhsil müəssisələrinin tələbələri arasında basketbol turniri keçirilib.
Gencexeber.az məlumat verir ki, iki gün davam edən yarış Azərbaycan Basketbol Federasiyasının hakimlər kollegiyasının müvafiq lisenziyaya malik meydan və masa hakimləri tərəfindən idarə olunub.
Kubok uğrunda Azərbaycan Texnologiya Universiteti, Azərbaycan Dövlət İqtisad Universitetinin Zaqatala filialı, Azərbaycan Dövlət Aqrar Universiteti, Gəncə Dövlət Universiteti və Mingəçevir Dövlət Universitetinin tələbə komandaları mübarizə aparıblar.
Finalda Azərbaycan Texnologiya Universiteti ilə Gəncə Dövlət Universitetinin komandaları qarşılaşıb. Gərgin və maraqlı keçən matç 107:96 hesabı ilə ATU-nun qələbəsi ilə başa çatıb. Bununla da ATU basketbol üzrə regional turnirin qalibi olub.
Yarışın sonunda qaliblərə medal, diplom və kubok təqdim olunub.
