Xəbər verdiyimiz kimi, Goranboy rayonu ərazisində ölümlə nəticələnən ağır yol-nəqliyyat hadisəsi baş verib.
Gencexeber.az-ın məlumatına görə, qəza zamanı həyatını itirən 1986-cı il təvəllüdlü Adil Hüseynovun və onun 2008-ci il təvəllüdlü oğlu Sabir Hüseynovun yas mərasimi mərhumların yaşadığı rayonun Kələk kəndində keçirilib. Ata və oğul kənd qəbiristanlığında yanbayan torpağa tapşırılıb.
Qeyd edək ki, faciə Nadirkənd kəndi ərazisində qeydə alınıb. Belə ki, hərəkətdə olan "Lada" markalı minik avtomobili idarəetmədən çıxaraq yol kənarındakı ağaca çırpılıb.
Qəza zamanı həyatını itirənlərdən başqa, avtomobildə mərhum sürücünün 1991-ci il təvəllüdlü həyat yoldaşı və 2014-cü il təvəllüdlü qızı da olub. Yaralılar xəstəxanaya yerləşdirilib, hazırda onların müalicəsi davam edir. Xoşbəxtlikdən hər iki şəxsin həyati təhlükəsi yoxdur.
