Şəmkirdə ər-arvad arasında dava olub.
Gencexeber.az-ın əldə etdiyi məlumata görə, hadisənin istintaqı Şəmkir Rayon Məhkəməsində keçirilib.
Belə ki, təqsirləndirilən Tural Məmmədov (ad şərtidir) 2003-cü ildə Şəmkir şəhərində anadan olub. Bir neçə dəfə həyat yoldaşı Aynur Məmmədova (ad şərtidir) ilə arasında ailə məişət mübahisəsi zəminində münaqişə olub. Hadisə günü Tural arvadı ilə birlikdə yaxın qohumlarının toy şənliyində iştirak ediblər. Toyda spirtli içki qəbul edən Tural Aynurla dalaşıb. Evə gəldikdən sonra Aynur otağına girib qapını arxadan bağlayıb. Tural otağa girə bilmədiyi üçün əsəbiləşib, bu zaman qapını açan Aynura yumruq zərbələri vurmağa başlayıb.
Tural Məmmədov Azərbaycan Respublikası CM-nin 128-ci maddəsi ilə təqsirləndirilib.
Məhkəmədə təqsirləndirilən şəxs qismində dindirilən Tural Məmmədov özünü təqsirli bilib. İfadəsində göstərib:
“Aynurla birlikdə toya getmişdik. Toyda spirtli içki qəbul etdiyim üçün sərxoş oldum. Evə gəldikdə aramızda mübahisə yarandı. Arvadım otağa girib qapını bağlayıb mənə söyüş söydü. Buna görə əsəbiləşdim və o, otaqdan çıxdıqdan sonra onu döyməyə başladım. Əməlimdən peşmanam”.
Daha sonra məhkəmədə zərərçəkmiş Aynur Məmmədova ifadə verib:
“Turalla birlikdə toydan evə gəldikdən sonra sərxoş olduğu üçün dava çıxardı. Heç bir səbəb olmadan gecə 3-də mənə qarşı nalayiq sözlər işlətdi. Daha sonra yumruqlamağa, döyməyə başladı. Bədənimin müxtəlif nahiyələrinə vuraraq xəsarət yetirdi. Hazırda onunla barışdığım üçün şikayətim və tələbim yoxdur”.
Tərəflərin çıxışından sonra məhkəmə müşavirəyə yollanıb. Qarşı tərəfin şikayəti olmadığı üçün Tural Məmmədov məsuliyyətdən azad edilib.
Fidan İlqar
