Yevlaxda qohumlar arasında bıçaqlanma olub.
Gencexeber.az-ın əldə etdiyi məlumata görə, hadisənin istintaqı Şəki Ağır Cinayətlər Məhkəməsində keçirilib.
Belə ki, təqsirləndirilən Nicat Əsgərov (ad şərtidir) 2007-ci ildə Yevlax şəhərində doğulub. Həyat yoldaşı Aysel Əsgərova (ad şərtidir) ondan küsərək anası evinə gedib. Arvadının bu hərəkətindən əsəbiləşən Nicat qayınanasıgilə gedib. Həyat yoldaşını evə aparmaq istəyəndə qadının dayısı Əli Seyidov (ad şərtidir) buna icazə verməyib. Aralarında yaranmış mübahisə zamanı Nicat arvadının dayısı Əli Seyidovu bıçaqlayıb.
Nicat Əsgərov Azərbaycan Respublikası CM-nin 126.1-ci (sağlamlığa ağır zərbə vurma) maddəsi ilə təqsirləndirilib.
Məhkəmədə təqsirləndirilən şəxs ifadəsində göstərib:
“Hadisədən bir gün əvvəl həyat yoldaşım Aysellə dava etdiyimiz üçün küsüb anası evinə getdi. Mən də səhəri günü arvadımı evə qaytarmaq üçün qayınanamın evinə gedəndə Ayselin anası məni təhqir etməyə başladı. Bu zaman Ayselin dayısı həyata çıxıb məni vurdu. Mən də əsəbiləşib cibimdə olan bıçaqla onu vurdum”.
Daha sonra zərərçəkmiş Əli Seyidov məhkəmədə ifadə verib:
“Bir gün eşitdim ki, Aysel Nicat tərəfindən təhqir edildiyi üçün acıq edib evdən qaçıb. Məsələni aydınlaşdırmaq üçün bacımgilə getdim. Elə həmin gün Nicat da ora gəldi. Bacım Rayanın həyətdə qışqırığını eşidib çölə çıxdım. Gördüm ki, Nicatla dalaşır. Söyüş söydüyü üçün əsəbiləşib onu vurdum. Bu zaman Nicat cibindəki bıçaqla məni yaraladı”.
Məhkəmədə aparılan istintaq və tərəflərin çıxışları ilə Nicat Əsgərov cinayət üzrə təqsirli bilinib.
Məhkəmənin qərarı ilə Nicat Əsgərov 3 il müddətində azadlıqdan məhrum edilib.
Fidan İlqar
