Narınqala son Gəncə qalasının bir hissəsini təşkil edib. Şəhərin bu hissəsi mərkəzdə yerləşən İçqalanın tərkibində idi və sırf Xan ailəsinə mənsub bir ərazi olub.
Narınqala beşbucaq formasında inşa edilmişdir. Bu hissənin İçqala kimi 6 müdafiə bürcü mövcud olub. Onlardan üçü - Qapı, Şirəlibəy və Cəfərbəy bürcləri həm də İçqalanın bürcləri olub. Narınqalanın digər üç bürcü Cəfərbəy bürcündən başlayaraq qalanın içərisinə doğru gedən Narınqala divarının üzərində ucaldılmışdır.
Narınqalanın yeganə girişi olub. Girişin yanında minarə tipli bir müdafiə qülləsi olub. Narınqalanın girişinə çatmamış sağ tərəfdə Xan hamamı və Xan məscidi ucalırdı. Narınqalanın tam mərkəzində Xan Sarayı yer almışdı. Narınqalanın şimal tərəfində Zərbxana (sikkələrin kəsildiyi yer) və divanxana yerləşib. Narınqalada, həmçinin fəvvarələrlə bəzədilmiş bir neçə həyət mövcud olub. Fəvvarələrin suyu Narınqalaya çəkilmiş arxlardan götürülürdü.
Çar Rusiyası şəhəri 1804-cü ildə işğal edəndən sonra Narınqalanın bütün tikililərində rus məmurları yerləşdirilir, tarixi binalar yavaş-yavaş sökülməyə başlayır. 1870-ci illərdə isə “Avropa-tipli müasir kvartallar”ın salınması bəhanəsi ilə Narınqala Xan Sarayı, Xan məscidi, Xan hamamı, Zərbxana, Dəyirman, Karvansara və digər binalarla birlikdə tam olaraq yerləyeksan edilir.
Mənbələr:
