Gəncə Ağır Cinayətlər Məhkəməsində xuliqanlıq niyyətilə qəsdən sağlamlığa ağır zərər vurmada təqsirləndirilən yetkinlik yaşına çatmayan Elsevər Quliyevin (ad şərtidir) cinayət işi üzrə məhkəmə iclası keçirilib.
Pravda.аz xəbər verir ki, hadisə 2025-ci ildə Şəmkir rayonu, Kür qəsəbəsi ərazisində yerləşən parkda baş verib.
İttihama görə, E.Quliyev tanışı, zərərçəkmiş Musa Kərimovla (soyadı şərtidir) söhbət edərkən aralarında yaranmış mübahisə zəminində üzərində gəzdirdiyi turist bıçağı ilə zərərçəkmiş şəxsin bədəninin müxtəlif nahiyələrinə bir neçə dəfə zərbə endirib. Nəticədə Musa Kərimov sol əlindən xəsarəti alıb ki, bu xəsarətlər sağlamlığın qısa müddətə pozulmasına səbəb olan yüngül zərər kimi qiymətləndirilib. Bununla yanaşı, Musa Kərimov döş qəfəsindən də deşilmiş-kəsilmiş yara alıb. Ekspertiza rəyinə əsasən, bu xəsarət sağlamlığın uzun müddətə pozulmasına səbəb olmaqla yanaşı, insan həyatı üçün təhlükəli ağır zərər kimi qiymətləndirilib.
Məhkəmə baxışı zamanı Elsevər əməlini qismən etiraf edib.
O, ifadəsində deyib ki, zərərçəkmiş Musa onun yaxın dostudur və hadisə zarafat zamanı baş verib. Onun sözlərinə görə, bıçaq təsadüfən zərərçəkmiş şəxsin böyür nahiyəsinə dəyib.
Təqsirləndirilən şəxs hadisə zamanı özü xəsarət almadığını, zərərçəkmiş şəxslə aralarında əvvəllər hər hansı düşmənçilik olmadığını və təxminən 4 ilə yaxındır dost olduqlarını vurğulayıb.
Hakim Dadaş İmanovun sədrliyi ilə keçirilən prosesdə hökm oxunub.
Məhkəmənin hökmü ilə ona şərti cəza verilib və Elsevər Quliyev dərhal məhkəmə iclas zalında həbsdən azad olunub.
