Azərbaycan Texnologiya Universitetində (ATU) son buraxılış kursu tələbələri üçün Karyera Festivalı təşkil olunacaq.
Gencexeber.az-a universitetdən verilən məlumata görə, festival tələbələrin əmək bazarına daha uğurlu inteqrasiyasına dəstək göstərmək, onların potensial işəgötürənlərlə birbaşa ünsiyyət qurmasına şərait yaratmaq və karyera inkişafına yönəlik bacarıqlarını artırmaq məqsədi daşıyır.
Festival çərçivəsində mayın 14-də əmək yarmarkası və karyera təlimləri keçiriləcək. Tədbirin ikinci günü – mayın 15-də isə iştirakçılar üçün karyera forumu təşkil olunacaq.
Karyera Festivalında tələbələr müxtəlif şirkət və qurumların nümayəndələri ilə görüşmək, vakansiyalar barədə məlumat almaq, həmçinin peşəkar inkişaf və iş həyatına hazırlıq mövzularında təlimlərdə iştirak etmək imkanı əldə edəcəklər.
Tədbir ATU-nun kampusunda baş tutacaq.
