Gəncədə gənclər üçün seminarlar təşkil olunur. Bu haqda 23 iyun tarixində İcra Hakimiyyətinə istinadən məlumat veririk.
Mənəvi Dəyərlərin Təbliği Fondunun təşkilatçılığı ilə Heydər Əliyevin anadan olmasının 100 illiyi münasibəti ilə “Ulu öndər: dəyərlərimizin xilaskarı” mövzusunda üç günlük seminar-treninqin açılış mərasimi keçirilib. Burada Dini Qurumlarla İş üzrə Dövlət Komitəsinin Gəncə Bölgəsi üzrə şöbəsinin müdiri, İcra Hakimiyyəti başçısı Aparatının məsul əməkdaşı, YAP Gəncə şəhər təşkilatının sədri, Gənclər və İdman Baş İdarəsinin rəisi, Mənəvi Dəyərlərin Təbliği Fondunun nümayəndəsi və fəal gənclər iştirak ediblər.
Tədbirdə bildirilib ki, üçgünlük seminarda Gəncə şəhəri ilə yanaşı, Goranboy, Naftalan, Samux və Göygöl rayonlarından olan ümumilikdə 60 nəfər gəncin iştirakı nəzərdə tutulub. Treninqlər çərçivəsində ekspertlər tərəfindən müxtəlif mövzularda mühazirə və diskussiyaların təşkili, şəhər ərazisindəki tarixi-mədəni abidələrin ziyarət edilməsi, intellektual yarışlar və digər əhəmiyyətli tədbirlərin həyata keçirilməsi planlaşdırılıb.
Açılış mərasimində Fondun maliyyə dəstəyi ilə hazırlanmış "Heydər Əliyev və Azərbaycançılıq" filmi də nümayiş olunub.
