Bu gün şəhidlər Aydın Həsənov, İlqar Kərimov və Şahbuz Rəhimovun doğum günləridir.
Aydın Elşən oğlu Həsənov 15 dekabr 1995-ci ildə Gəncədə anadan olub. 2011-ci ildə Gəncə şəhər 44 nömrəli ingilis dili təmayüllü məktəb-lisey kompleksinin 9-cu sinfini bitirib və təhsilini 2012-2015-ci illərdə 3 nömrəli peşə liseyində davam etdirib.
O, 2014-cü ildə həqiqi hərbi xidmətə yollanıb. Vətən müharibəsi zamanı yenidən ordu sıralarına çağırılıb. Həsənov Aydın 8 noyabr 2020-ci il tarixində Xankəndi ərazisində gedən döyüşlərdə düşmən gülləsinə tuş gələrək şəhidlik zirvəsinə ucalıb.
Şəhidimiz 11 noyabr 2020-ci ildə Gəncə Şəhidlər xiyabanında dəfn olunub.
İlqar Becan oğlu Kərimov 15 dekabr 1968-ci ildə Gəncədə anadan olub. 15 saylı texniki-peşə məktəbində rəngsazlıq peşəsinə yiyələnib.
O, 1984-1986-cı illərdə Stavropol şəhərində həqiqi hərbi xidmətdə olub. 27 iyun 1993-cü ildə könüllü olaraq cəbhəyə yollanıb. Seyfəli poliqonunda 2 ay xidmət keçdikdən sonra Ağdam rayonuna göndərilib.
İlqar Becan oğlu Kərimov 2 dekabr 1993-cü ildə Ağdam rayonu uğrunda gedən döyüşdə şəhidlik zirvəsinə ucalıb.
Şəhidimiz 4 dekabr 2020-ci ildə Gəncə Şəhidlər xiyabanında dəfn olunub.
Şahbuz Dursun oğlu Rəhimov 15 dekabr 1974-cü ildə Qərbi Azərbaycanın Amasiya rayonunda anadan olub. O, 1988-ci ildə ailəsi ilə birlikdə Gəncə şəhərinə gəlib və təhsilini Gəncə şəhər 28 saylı məktəbdə davam etdirib.
O, 1992-ci ildə həqiqi hərbi xidmətə yollanıb. 7 may 1994-cü ildə Füzulinin Kərimbəyli kəndində Şahbuz Rəhimov və yanında olan 8 döyüş yoldaşı şəhidlik zirvəsinə ucalıblar.
Şəhidimiz 9 may 2020-ci ildə Gəncə Şəhidlər xiyabanında dəfn olunub.
