Günümüzdə tez-tez avtobus yaxud taksi sürücülərinin riskli avtomobil idarə etdiyinin şahidi oluruq. Bu da daha çox özünü sürücülərin mobil telefondan istifadə edərək avtomobil idarə etdiyi vaxt baş verir. Bu hal təkcə paytaxtda deyil, ölkəmizin digər bölgələrində də yaşanır.
Gencexeber.az-a sakinlər tərəfindən təqdim edilən görüntülərdən də aydın olur ki, sözügedən vəziyyətə Gəncədə də rast gəlinir. Belə ki, şəhərdə fəaliyyət göstərən 4 və 7 saylı sərnişin avtobuslarının sürücüləri mobil telefondan istifadə edir, bu isə öz növbəsində onların diqqətini cəmləməyə əhəmiyyətli dərəcədə təsir göstərir. Bu vəziyyət isə qəzaların baş verməsinə səbəb olur.
Şəhər sakinlərinin sözlərinə görə, bəzi sürücülər sükan arxasında “TikTok” kimi sosial şəbəkələrdən istifadə edir çox vaxt isə telefonla danışırlar.
Qeyd edək ki, yol təhlükəsizliyi təkcə sürücülərin deyil, həm də sərnişindaşıma sahəsində fəaliyyət göstərən şirkətlərin, eləcə də tənzimləyici orqanların məsuliyyətidir.
