Gəncə şəhər Heydər Əliyev Park-Xiyaban Kompleksində Azərbaycan Respublikasının Gənclər Fondunun həyata keçirdiyi “İdeyanı Reallaşdır 2023” müsabiqəsi çərçivəsində Gəncə Dövlət Universitetinin (GDU) Tələbə Gənclər Təşkilatının fəal üzvlərinin iştirakı ilə “Kod da Vinci” adlı intellektual yarış keçirilib.
Gencexeber.az GDU-ya istinadən məlumat verir ki, yarışın əsas məqsədi yalnız intellektual biliklərin yoxlanılması deyil, eyni zamanda Gəncə şəhərinin tarixi, mədəni irsinin öyrənilməsi və təbliği olub. Yarış iştirakçıları Gəncədə yerləşən abidə, küçə adları və digər tarixi-mədəni obyektlər haqqında şifrələnmiş 5 sualı cavablandırıblar.
Tədbirin sonunda 1-ci, 2-ci və 3-cü yerləri tutan iştirakçılar sertifikat, medal, kubok və dəyərli hədiyyələrlə təltif ediliblər. Bununla yanaşı, yarışın bütün iştirakçıları sertifikatlarla təltif olunaraq mükafatlandırılıb. Təltifetmə mərasimi Gəncə Gənclər Evində keçirilib.
