Gəncədə güclü yağışların fəsadları aradan qaldırılır. Bu haqda 24 iyun tarixində Kəpəz televiziyasına istinadən məlumat veririk.
Bir neçə gündür müşahidə olunan intensiv yağıntılar, süni göldə suyun səviyyəsinin artması bır sıra fəsadlara yol açıb. Sel suları evlərə dolub, ərazidə hərəkəti çətinləşdirib. Fövqəladə Hallar Nazirliyinin qüvvələri tərəfindən zəruri təhlükəsizlik tədbirləri davam edir. İcra Hakimiyyəti başçısı yanında Fövqəladə Hallar Komissiyası üzvləri təbii fəlakətin yaratdığı fəsadların yerində araşdırılması və dəyən ziyanın qiymətləndirilməsi üçün iş aparır.
Sel Heydər Əliyev Park-Kompleksinin alt hissəsində yerləşən yaşayış yerində olan evlərə ciddi ziyan vurub. Evlərin həyətyanı sahələrinə, eləcə də mənzillərə su dolub. Təxminən 30-a yaxın yaşayış evini su basıb, sakinlərin məişət əşyalarını yararsız hala salıb, həyətlərdə hasarları dağıdıb.
Təbii fəlakətlə bağlı Azərbaycan Meliorasiya və Su Təsərrüfatı Açıq Səhmdar Cəmiyyətinin sədr müavini Zakir Quliyev, icra başçısı Niyazi Bayramov və Fövqəladə Hallar Komissiyası üzvləri ərazidə olublar. Selin yaratdığı fəsadlarla yerində tanış olub, sakinlərlə görüş keçiriblər. Ərazidə olan evlərin sənədsiz olduğu, tikintisi üçün yerin düzgün seçilmədiyi müəyyənləşib. Bundan başqa, burada yağış sularının axıdılması üçün nəzərdə tutulan arxın qarşısının kəsildiyi də aşkarlanıb.
Gələn güclü sel Heydər Əliyev Park-Kompleksində olan süni gölün bir hissəsini tamamilə dağıdıb. Bu hissədə təmir-bərpa işlərinin aparılması üçün süni gölün suyu ətrafa çıxarılır. Dağılan yerdə isə təxminən 20 metr dərinliyində yarğan əmələ gəlib.
Təbii fəlakətlə bağlı Fövqəladə Hallar Komissiyası tərəfindən dəyən ziyan hesablanır.
