Gəncədə İsveç səfiri ilə görüş baş tutub. Bu haqda 14 iyun tarixində İcra Hakimiyyətinə istinadən məlumat veririk.
Xəbər verdiyimiz kimi, İsveç Krallığının ölkəmizdəki fövqəladə və səlahiyyətli səfiri Tobias Loretzon Nizami yurduna səfər edib. Diplomat icra başçısı Niyazi Bayramovla görüşüb. Niyazi Bayramov qonağa şəhərimiz haqqında ətraflı məlumat verib. O bildirib ki, Gəncə Azərbaycanın ən qədim şəhərlərindən biridir.
Tobias Loretzon səfər çərçivəsində Nizami Gəncəvi Məqbərəsində, Gəncə Dövlət Filarmoniyasında, Cavad xan Türbəsində olduğunu, Gəncə Dövlət Dram Teatrını, Heydər Əliyev Park-Xiyaban Kompleksini ziyarət etdiyini qeyd edib. Səfir Gəncə Dövlət Dram Teatrında İsveç uşaq ədəbiyyatının ən məşhur nümayəndəsi Astrid Lindqrenin əsərinin tamaşaya qoyulması ilə bağlı təklif də irəli sürüb. Diplomat, həmçinin “Azəralüminium” MMC və “Gəncə Şərab-2” ASC-ni ziyarət edəcəyini bildirib.
Görüşdə qarşılıqlı əməkdaşlıq imkanları müzakirə olunub. Sonda hədiyyələr təqdim olunub, xatirə şəkli çəkdirilib.
