Gəncədə evlərin birinin qarşısı qazılıb. Bu haqda Gencexeber.az-a 28 iyun tarixində məlumat daxil olub.
Söhbət Məmmədyusif Axundzadə küçəsindən gedir. Burada sakinlərin sözlərinə görə, “Azəriqaz” İstehsalat Birliyi kommunal işlər görüb. Yolun digər tərəfində olan evlərin birinə qaz xətti çəkilib. Bu səbəbdən burada evin hasarına bitişik olan qaz qovşağından həmin evə xətt aparılıb. Kommunal işlər səbəbindən ərazi qazılıb. Lakin işlər bitdikdən sonra həmin yerin üstü örtülməyib.
“Evlərimizin qarşısını qazdılar, elə də qoyub getdilər. Məsələ ilə bağlı aidiyyəti quruma xəbər edəndən sonra gəlib, yolun bir hissəsinə sement tökdülər. O biri hissəsi elə də qaldı. Küçədə hərəkət etmək çətinləşib”, - deyə sakinlər bildiriblər. Onlar, həmçinin əlavə ediblər ki, bu hal həyətdə oynayan azyaşlılar üçün də təhlükə yaradır. Sakinlər küçələrinin təmir olunmasını istəyirlər.
