Gəncədə məhəllə sakinləri həyətlərinin cari vəziyyətindən narahatdırlar. Bu haqda Gencexeber.az-a 26 yanvar tarixində məlumat daxil olub.
Söhbət Zərifə Əliyeva, Nizami Gəncəvi prospektləri və 3-cü mikrorayondan gedir. Adıçəkilən ərazilərdə asfalt örtüyü mövcud deyil.
“Həyətimiz pis vəziyyətdədir. Bir müddət əvvəl burada yeni kanalizasiya xəttinin çəkilməsi üçün qazıntı işləri aparılıb. Lakin daha sonra küçə təmir edilməyib. Yollar daş-kəsəklidir. Tez-tez ayyaqabı dəyişməli oluruq”, deyə 3-cü mikrorayondakı 25-ci binanın sakinləri qeyd ediblər.
Adıçəkilən digər ərazilərdə yaşayan əhalinin sözlərinə görə isə yağış yağandan sonra məhəllədə palçıq və gölməçələr yaranır. Bu da onların hərəkətində çətinliklərə gətirib çıxarır.
Bundan başqa, Şah İsmayıl Xətai prospektində avtomobil yolunda çöküntü əmələ gəlib. Nəticədə nəqliyyat vasitələrinin hərəkətində maneələr yaranıb.
[modula id="53838"]
