Gəncədə avtomobil vuran piyadanın son vəziyyəti məlum olub. Bu haqda Gencexeber.az-a 3 fevral tarixində məlumat daxil olub.
Atatürk prospekti ilə İç Qala küçəsinin kəsişməsində dönmə əməliyyatını düzgün yerinə yetirməyən “VAZ-2107” markalı avtomobilin “Mercedes”lə toqquşması və sonra yolu keçən gənc piyadanı vuraraq park olunmuş digər maşına çarpılması barədə məlumat vermişdik. Hadisə 17 yanvar tarixində baş vermişdi.
Qəza zamanı xəsarət alan piyada redaksiyamızla əlaqə saxlayıb. O, son durumu ilə bağlı məlumat verib.
“Hadisə zamanı əraziyə polis əməkdaşları cəlb olunmadı və məndən izahat alınmadı. Mən hələ də yataqdan qalxa bilmirəm. Heç kim vəziyyətimlə maraqlanmır. Qəzanın görüntülərini istəsəm də, məndən gizlətdilər. Müvafiq orqanlardan xahiş edirəm ki, mənə yardım etsinlər. Hadisəni törədən şəxsin üzə çıxmasını və məsuliyyətə cəlb olunmağını istəyirəm”, - deyə piyada bildirib.
