Gəncədə müsabiqənin ilk mərhələsi üçün hazırlıq işləri görülür. Bu haqda 30 may tarixində Regional Təhsil idarəsinə istinadən məlumat veririk.
“Peşəkar İdarəçi” (Pİ) müsabiqəsində iştirak üçün Gəncə-Daşkəsən Regional Təhsil İdarəsi üzrə 474 nəfər namizəd müraciət edib. Onlardan 469-u müsabiqənin test imtahanı mərhələsində iştirak hüququ qazanıb. Burada namizədlərin tənqidi oxu bacarığı, əmək və təhsil qanunvericiliyi üzrə bilikləri, məntiqi təfəkkürü yoxlanılacaq. Test imtahanının iyun ayında keçirilməsi nəzərdə tutulur.
Müvafiq keçid balını toplamış namizədlərin nəzəri və praktiki bilikləri (tədrisin təşkili və keyfiyyəti, məzmun və qiymətləndirmə, kadr məsələləri, maliyyə-təsərrüfat məsələləri, hüquqi biliklər) yazı işi (esse) mərhələsində yoxlanılacaq. Yazılı imtahan turunda uğur qazanmış şəxslər təlimlərə cəlb olunacaqlar. Daha sonra təcrübəkeçmə dövrü başlayacaq.
Bu mərhələdə namizədlər kuratorlar təhkim olunmaqla 4 modul üzrə təcrübə keçəcəklər:
I modul: Kadr inzibatçılığı;
II modul: Maliyyə-təsərrüfat məsələləri;
III modul: Tədrisin təşkili və idarə olunması;
IV modul: Tədrisin keyfiyyəti və qiymətləndirilməsi.
