Gəncədə dağılmış süni gölün ətrafında təmir işləri aparılır. Bu haqda 14 fevral tarixində Kəpəz televiziyasına istinadən məlumat veririk.
Ötən ilin aprel-may aylarında şəhərimizdə yağan güclü yağış nəticəsində Heydər Əliyev Park-Kompleksində yerləşən süni göl daşaraq ətraf ərazini su altında qoymuşdu. Bu hadisənin təkrarlanmaması üçün hazırda gölün ətrafında bərkitmə işləri gedir.
Ötən ilin sonundan burada bəndvurma və bərkitmə işləri start götürüb. Bildirilir ki, gölün kənarının tam təmiri prosesi başlamaq üzrədir. Baş verə biləcək selin fəsadlar yaratmaması üçün beton kanal salınıb və suqəbuledici qurğu inşa edilib. Gölün ətrafında avtomobillərin və piyadaların hərəkəti üçün yeni yol çəkilir, körpü salınır.
Məlumata əsasən, yenidənqurma işləri çərçivəsində öncəkindən fərqli olaraq, gölün ətrafı məhəccərlə bağlanacaq.
