Gəncədə şəhər rəhbərliyi uşaq evinin sakini ilə görüşüb. Bu haqda 5 sentyabr tarixində İcra Hakimiyyətinə istinadən məlumat veririk.
Bir müddət öncə Gəncə Uşaq Evinin sakini Həsən Həsənovun tələbə adını qazanması barədə xəbər paylaşmışdıq. İcra başçısı Niyazi Bayramov həmin yeniyetmə ilə görüşüb. Tədbirdə millət vəkilləri, YAP Gəncə şəhər təşkilatının sədri, Gəncə Uşaq Evinin direktoru, Gəncə Şəhər İcra Hakimiyyəti başçısı Aparatının məsul əməkdaşları iştirak ediblər.
Niyazi Bayramov Həsəni ali məktəbə qəbul olması münasibətilə təbrik edərək, gələcək həyatında uğurlar, yüksək nailiyyətlər arzulayıb, ona hədiyyə bağışlayıb.
Qeyd edək ki, Həsən Həsənov 2006-cı ildə anadan olub. 2012-ci ildən etibarən Gəncə Şəhər Uşaq Evində yaşayır. Bir bacısı və bir qardaşı var. 34 nömrəli tam orta məktəbin məzunudur. O, 413,30 bal toplayaraq dövlət sifarişi ilə Azərbaycan Dövlət Pedaqoji Universitetinin “Sosial iş” ixtisasına qəbul olub.
