Gəncədə şəhər rəhbərliyi heyvanların satış və kəsim məntəqələrində olub. Bu haqda 26 iyun tarixində İcra Hakimiyyətinə istinadən məlumat veririk.
Bir müddət öncə şəhər ərazisində qurbanlıq heyvan kəsimi və ət satışı məntəqələrinin siyahısını təqdim etmişdik. İcra başçısı Niyazi Bayramov sözügedən məntəqələrə baxış keçirib, burada yaradılan şəraitlə yerində tanış olub. Şəhər rəhbərinə məlumat verilib ki, satış və kəsim məntəqələrində baytarlıq nəzarətindən keçmiş və sanitar-gigiyenik tələblər gözlənilməklə İslam qaydası əsasında kəsilmiş qurbanlıq heyvanlar əhaliyə təqdim ediləcək.
Bununla yanaşı, bildirilib ki, ətraf ərazilərin çirklənməsinin qarşısının alınması məqsədilə kəsim zamanı heyvanın qanı və digər axıntıların kanalizasiya vasitəsilə kənarlaşdırılması üçün məntəqələrin döşəməsi drenaj sistemi ilə təmin olunub. Məntəqələrdə tullantıların daşınması üçün nəzərdə tutulan xüsusi konteynerlər də yerləşdirilib.
Niyazi Bayramov görülən işlərlə yerində tanış olduqdan sonra aidiyyəti üzrə tapşırıq və tövsiyələrini verib.
