Macarıstan Kənd Təsərrüfatı və Həyat Elmləri Universitetinin (MATE) rektoru Csaba Gyuriczanın rəhbərlik etdiyi nümayəndə heyəti Gəncədə Azərbaycan Texnologiya Universitetinə (ATU) səfər edib.
Gencexeber.az ATU-ya istinadən məlumat verir ki, nümayəndə heyətinin tərkibində Macarıstanın Azərbaycandakı səfiri Tamaş Torma, səfirliyin mədəniyyət və təhsil məsələləri üzrə diplomatı Monika Felföldi, iqtisadi və ticarət məsələləri üzrə attaşesi Daniel Brenner, MATE-nin Beynəlxalq əlaqələr üzrə direktoru David Bekeşi təmsil olunub.
Görüşdə universitetlərarası əməkdaşlıq imkanları ətraflı müzakirə edilib. Sonda hər iki universitet arasında əməkdaşlıq memorandumu imzalanıb. Sənəddə tələbələrin və akademik heyətin mübadiləsi, birgə konfrans, seminar və təlimlərin keçirilməsi, elmi əməkdaşlıq və s. öz əksini tapır.
Səfər çərçivəsində nümayəndə heyəti universitetin laboratoriyaları, tədris mərkəzləri, maddi-texniki bazası ilə yaxından tanış olub.
Qeyd edək ki, MATE dünya universitetlərinin reytinqi (QS World University Rankings) sıralamasında 1001-1200 aralığında, Avropa universitetləri arasında 615-ci yerdədir.
