Gəncədə komanda yarışı keçirilib. Bu haqda 17 iyun tarixində Gənclər və İdman Baş idarəsinə istinadən məlumat veririk.
“Mənim hüquqlarım mənim məsuliyyətimdir” adlı yarış 18 İyun - Milli İnsan Hüquqları Günü ilə əlaqədar Gəncə Şəhər Gənclər və İdman Baş İdarəsinin təşkilatçılığı, Ombudsmanın Qərb Regional Mərkəzinin dəstəyi və gənclərin iştirakı ilə baş tutub. Məqsəd gənclərin insan hüquqları ilə bağlı məlumatlılıq səviyyəsinin artırılması olub.
Ombudsmanın Qərb Regional Mərkəzinin rəhbəri Səbuhi Abbasov günün əhəmiyyətindən və yarışın mövzusundan danışaraq gənclərə uğurlar arzulayıb. Sonra yarış Gənclər və İdman Baş İdarəsinin gənclərlə iş sektorunun baş məsləhətçisi Maarif Quliyev tərəfindən aparılıb.
Müsabiqədə 5 komandada 2 saylı Regional Asan Xidmət Mərkəzinin, Maarif Evinin, S.MSÖY Təhsil Mərkəzinin, 11 saylı kitabxana filialının və “Fərəh” Sosial İctimai Birliyinin gəncləri iştirak ediblər. İki mərhələdən ibarət olan yarışın nəticələrinə əsasən, “Fərəh” komandası qələbə qazanıb. Qaliblərə hədiyyələr təqdim edilib.
