Gəncədə şagirdlərlə görüş keçirilib. Bu haqda 30 sentyabr tarixində ADAU-ya istinadən məlumat veririk.
Müxtəlif məktəblərdə təhsil alan şagirdlərlə Azərbaycan Dövlət Aqrar Universitetinin əməkdaşları tərəfindən karyera planlaması mövzusunda silsilə görüşlərə başlanıb. Tədbirdə Gəncə-Daşkəsən Regional Təhsil İdarəsinin müdiri Anar Qədiməliyev çıxış edib. Daha sonra ADAU-nun rektoru Zəfər Qurbanov seçim qarşısında qalan gənclərə öz tövsiyələrini verib.
Tədbirdə, həmçinin ADAU-nun tanıtım çarxı nümayiş olunub.
Universitetin Mətbuat və ictimaiyyətlə əlaqələr şöbəsinin müdiri Elcan Məmmədov, İnsan resursları şöbəsinin müdiri Günay Rəfiyeva, Təcrübə və karyera mərkəzinin müdiri Gülnaz Əsgərova və TGT sədri Nizami Məmmədov şagirdlərə müxtəlif mövzularda aqrar təhsilin üstünlükləri, müasir dövrümüzdə kənd təsərrüfatı mütəxəssislərinə olan tələbat və digər mövzular barədə təqdimatlar ediblər.
Sonda görüşdə aktiv iştirak edən şagirdlərə ADAU rəhbərliyi tərəfindən qiymətli hədiyyələr təqdim olunub.
