Gəncədə universitetlərin birində beynəlxalq konfransın iclası keçirilib. Bu haqda 21 sentyabr tarixində Azərbaycan Texnologiya Universitetinə istinadən xəbər veririk.
Azərbaycan Texnologiya Universitetində plenar iclas baş tutub. Tədbirdən öncə Heydər Əliyevin büstü və ATU-nun şəhid tələbə və məzunlarının abidəsi ziyarət edilib, önünə gül dəstələri düzülüb. İclasın əvvəlində Himn səsləndirilib və şəhidlərin əziz xatirəsi bir dəqiqəlik sükutla yad edilib.
Tədbirdə universitetin rektoru vəzifəsini müvəqqəti icra edən Yaşar Ömərov, Türkiyənin İqtisadi İnkişaf və Sosial Araşdırmalar İnstitutunun prezidenti Mustafa Latif Emek və Azərbaycan təmsilçisi Əlvan Cəfərov, elm və təhsil nazirinin müşaviri Nicat Məmmədli, Azərbaycan Mili Elmlər Akademiyasının vitse-prezidenti akademik Rasim Əliquluyev, “Azəralüminium” MMC Gəncə İstehsalat Kompleksinin direktoru Cəmil Səfərov və ATU İnnovasiya Mərkəzinin direktoru Şamo Salayev iştirak ediblər. Onlar mövzu haqqında danışıblar, konfransa 10 ölkədən 121 məqalənin göndərildiyini qeyd ediblər.
İclasın sonunda Əlvan Cəfərov Yaşar Ömərova İKSAD-nin təltifnaməsini təqdim edib. Rektor isə öz növbəsində İKSAD rəhbərliyinə "Şuşa" tablosunu hədiyyə edib.
Qeyd edək ki, Mühəndislik elmləri üzrə II Beynəlxalq Konfrans ATU və İKSAD-nin birgə təşkilatçılığı ilə baş tutub. Panellərin bir hissəsi Türkiyədə təşkil olunub.
