Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin təşkilatçılığı ilə tədbir keçirilib. Bu haqda 1 may tarixində Gəncə Dövlət Tarix Mədəniyyət Qoruğuna istinadən xəbər veririk.
İcra Hakimiyyətinin, Gəncə Dövlət Universitetinin və Gəncə Dövlət Tarix-Mədəniyyət Qoruğunun dəstəyi ilə “Mədəni irsimizi tanıyaq və tanıdaq” mövzusuna həsr edilmiş tədbir baş tutub. Burada aidiyyəti dövlət qurumlarının nümayəndələri, universitetin akademik heyəti və tələbələr iştirak ediblər.
Gəncə Dövlət Universitetində baş tutan tədbirdə şəhərimizin mədəni irsi ilə xalqımızın milli sərvətlərinin qorunmasına verdiyi töhfələrdən, dövlət mühafizəsində olan tarix və mədəniyyət abidələrinin qorunması işinin təşkilindən bəhs edilib. Daha sonra tarix və mədəniyyət abidələrinin qorunması, tədqiqi, onlardan istifadə edilməsi mövzusunda slaydlar və videoçarx təqdim olunub. Sonda mövzu ətrafında tələbələrin sualları cavablandırılıb.
