Gəncədə yaşayış massivlərindən birini su basıb. Bu haqda 15 iyun tarixində MKTİB-yə istinadən məlumat veririk.
Ötən gün şəhərdə müşahidə olunan güclü külək və leysan barədə xəbər vermişdik. Nəticədə bir sıra fəsadlar yaranıb. Səfərbərlik və Hərbi Xidmətə Çağırış üzrə Dövlət Xidmətinin Nizami rayon Şöbəsinin ətraf ərazilərində yerləşən yaşayış evlərinin həyətinə və zirzəmisinə yağış suları dolub. Yaranmış problemin həlli istiqamətində aidiyyəti qurumlar tərəfindən təxirəsalınmaz tədbirlər görülüb. Şəhər Fövqəladə Hallar Komissiyasının üzvləri əraziyə yerində baxış keçiriblər. FHN-in Gəncə Regional Mərkəzinin əməkdaşları gün ərzində evlərin zirzəmilərinə və həyətinə dolan suyun çəkilməsi istiqamətində işlər aparıblar.
Bildirilir ki, sözügedən ərazidə evlərin qanunsuz inşa olunması ehtimalı səbəbindən müvafiq araşdırmalar aparılmaqla məsələnin hüquq çərçivəsində həlli istiqamətində aidiyyəti qurumlarla müzakirələr həyata keçirilir.
