Gəncədə bir neçə mövzuda tədbirlər baş tutub. Bu haqda 28 noyabr tarixində KOBİM-ə istinadən məlumat veririk.
KOB İnkişaf Mərkəzi (KOBİM) "Maliyyə savadlılığı", "Mühasibatlıq", "Biznes planın yazılması", "Sahibkarlıq", "Liderlik" və "Marketinq" mövzularında maarifləndirici təlimlər keçirib. Burada sahibkarlar iştirak ediblər.
"Maliyyə savadlılığı" mövzusundakı tədbirdə büdcə, gəlir və xərc anlayışı, borc və öhdəliklərin müəyyən edilməsi, investisiya və faizlərin idarə olunması, risk dərəcələri və onun idarə olunması barədə məlumat verilib.
"Mühasibatlıq" və "Biznes planın yazılması" mövzularında keçirilən təlimlərdə mühasibatlıq haqqında əsas anlayışlar, beynəlxalq və milli mühasibat uçotu sahəsində əldə edilən təcrübələr, hesablar planı və kommersiya təşkilatları, büdcədən maliyyələşən təşkilatlar, mühasibat uçotunda maliyyə hesabatları, cari aktivlər və uzunmüddətli aktivlər uçotunun aparılması haqda danışılıb.
"Sahibkarlıq" mövzusunda baş tutan tədbirdə sahibkarlığın hüquqi formaları, sahibkarlıq fəaliyyətini tənzimləyən qanunlar və normativ aktlar barədə ətraflı məlumat verilib.
"Liderlik" mövzusundakı təlimdə liderliyin önəmi və rolu, yerli və beynəlxalq təcrübədə liderlik anlayışı, sahibkarlara liderlik ruhunun aşılanması, komandanın idarə edilməsində menecer və liderin funksiyaları, onlar arasında olan oxşarlıq və fərqliliklər haqda danışılıb.
"Marketinq" mövzusunda keçirilən tədbirdə isə marketinq araşdırması, hədəf kütlənin müəyyən olunması, marketinq planlaşdırmasının əsas istiqamətləri, məhsul, qiymət barədə ətraflı məlumat verilib.
Qeyd edək ki, KOBİM tərəfindən göstərilən bütün xidmətlər ödənişsizdir.
